ಲಿಂಗಾಯತ ಕ್ರಾಂತಿ Just another WordPress site
Related Articles
ತಮ್ಮ ಸ್ವಾರ್ಥಕ್ಕೆ ಪಂಚಪೀಠಗಳನ್ನು ಒಡೆದು ಆಳುವ ನೀತಿ ಅನುಸರಿಸುತ್ತಿರುವ ಬಾಳೆಹೊನ್ನೂರು ಶ್ರೀ ರಂಭಾಪುರಿ ಜಗದ್ಗುರು ವೀರಸೋಮೇಶ್ವರ ಶಿವಾಚಾರ್ಯ ಭಗವತ್ಪಾದರು ಬೇರೆಯವರನ್ನು ಟೀಕಿಸುವ ಮೊದಲು ಆತ್ಮಾವಲೋಕನ ಮಾಡಿಕೊಳ್ಳಬೇಕು.
ಬೆಂಗಳೂರಿನ ವಿಜಯನಗರದ ಬಸವ ಸುಜ್ಞಾನ ಮಂಟಪದಲ್ಲಿ ಮಂಗಳವಾರ (14.9.2021) ವೀರಶೈವ-ಲಿಂಗಾಯತ ಸಂಘಟನಾ ವೇದಿಕೆ ಏರ್ಪಡಿಸಿದ್ದ ಶ್ರೀ ವೀರಭದ್ರೇಶ್ವರ ಜಯಂತ್ಯುತ್ಸವದಲ್ಲಿ ಆಶೀರ್ವಚನ ನೀಡುವಾಗ ಜಗದ್ಗುರುಗಳು ಆಡಿರುವ ಮಾತುಗಳು ನಿಜಕ್ಕೂ ವಿಷಾದನೀಯ.
ಇವತ್ತು ರಂಭಾಪುರಿ ಶ್ರೀಗಳು ತಮ್ಮ ಶಾಖಾ ಮಠಗಳನ್ನೇ ಒಡೆದು ಆಳುತ್ತಿರುವ ವಿಚಾರ ಜಗಜ್ಜಾಹೀರಾಗಿದೆ. ಹೀಗಾಗಿ ಇವತ್ತು ಯಾರೂ ಇವರ ಹತ್ತಿರಕ್ಕೆ ಹೋಗಲು ಹಾತೊರೆಯುತ್ತಿಲ್ಲ. ಬದಲಾಗಿ ದೂರವಾಗುತ್ತಿದ್ದಾರೆ. ಇದಕ್ಕೆ ಸ್ಪಷ್ಟ ಉದಾಹರಣೆ ಇತ್ತೀಚೆಗಿನ ಉಜ್ಜಯಿನಿ ಪೀಠದ ಪೀಠಾಧಿಪತಿ ನೇಮಕದ ಪ್ರಕರಣವೇ ಸಾಕ್ಷಿ.
ಈ ಪ್ರಕರಣದಲ್ಲಿ ರಂಭಾಪುರಿ ಶ್ರೀಗಳ ವಿರುದ್ಧ ಬೆಂಗಳೂರಿನಲ್ಲಿ 100ಕ್ಕೂ ಹೆಚ್ಚು ಜನ ಸ್ವಾಮೀಜಿಗಳು ಹಾಗೂ ಕಲ್ಬುರ್ಗಿ ಯಲ್ಲಿ 350ಕ್ಕೂ ಹೆಚ್ಚು ಜನ ಸ್ವಾಮೀಜಿಗಳು ಕಠಿಣ ಠರಾವು ಪಾಸು ಮಾಡಿದ್ದಾರೆ. ಭವಿಷ್ಯದಲ್ಲಿ ಇವರ ಜೊತೆ ಮುನ್ನಡೆಯದಂತೆ ತೀರ್ಮಾನಿಸಿದ್ದಾರೆ.
ಈಗಾಗಲೇ ರಂಭಾಪುರಿ ಶ್ರೀಗಳು ಉತ್ತರ ಕರ್ನಾಟಕದ ಸ್ವಾಮಿಗಳು ಮತ್ತು ಮೈಸೂರು ಭಾಗದ ಸ್ವಾಮಿಗಳು ಎಂದು ವಿಭಜನೆ ಮಾಡುವ ಮೂಲಕ ತಮ್ಮ ಬೇಳೆ ಬೇಯಿಸಿಕೊಳ್ಳುವ ಕುಟಿಲ ಪ್ರಯತ್ನ ಮಾಡುತ್ತಿದ್ದಾರೆ.
ಸ್ವಾಮೀಜಿಗಳ ಕರ್ತವ್ಯ ಧರ್ಮ ರಕ್ಷಣೆ. ಆದರೆ, ಇವರೇ ಧರ್ಮವನ್ನು ಒಡೆಯುವ ಕೆಲಸ ಮಾಡುತ್ತಿದ್ದಾರೆ. ಈ ಕಾರಣಕ್ಕಾಗಿಯೇ ರಂಭಾಪುರಿ ಶ್ರೀಗಳ ಮಠದ ಏಳ್ಗೆಗೆ ಹಗಲಿರುಳೂ ತನು-ಮನ-ಧನಗಳ ಧಾರೆಯೆರೆದು ದುಡಿದ ಖಾಸಾ ಭಕ್ತರು ಇವರಿಂದ ದೂರವಾಗಿದ್ದಾರೆ.
ಇವರ ಅಂತರಂಗದಲ್ಲಿ ಎಷ್ಟೆಲ್ಲಾ ಸಂಕುಚಿತತೆ ತುಂಬಿದೆ ಎಂಬುದನ್ನು ಇವರನ್ನು ಹತ್ತಿರದಿಂದ ಬಲ್ಲವರಿಗಷ್ಟೇ ಗೊತ್ತು. ಆದ್ದರಿಂದ, ವೇದಿಕೆ ಏರಿದಾಕ್ಷಣ ತಮ್ಮ ಹಳಸಲು ಹೇಳಿಕೆಗಳನ್ನು ಪದೇ ಪದೇ ಉದ್ಧರಿಸುವ ಇವರ ಮನಸ್ಥಿತಿಗೆ ಧಿಕ್ಕಾರವಿರಲಿ.
ತಮ್ಮ ಸವಕಲು ಧೋರಣೆಯ ವರ್ತನೆ ಬಿಟ್ಟು ಶಾಖಾ ಮಠಾಧೀಶರ ಏಳ್ಗೆ ಹಾಗೂ ಸಮಾಜದ ಬಾಂಧವರು, ಭಕ್ತರು ಶಿಕ್ಷಣ, ಉದ್ಯೋಗ ಮತ್ತು ಸಾಮಾಜಿಕವಾಗಿ ಉನ್ನತಿ ಹೊಂದಲು ಏನು ಬೇಕೊ ಆ ಕೆಲಸ ಮಾಡಲು ಮೊದಲು ಮುಂದಾಗಲಿ.
