ಲಿಂಗಾಯತ ಕ್ರಾಂತಿ Just another WordPress site
Related Articles
ಲಿಂಗಾಯತ ಕ್ರಾಂತಿ: ಪೂಜ್ಯ ಶ್ರೀ ಡಾ. ಬಸವಲಿಂಗ ಪಟ್ಟದ್ದೇವರ 70ನೇ ಹುಟ್ಟುಹಬ್ಬದ ಪ್ರಯುಕ್ತ ಭಕ್ತಿಯ ಶುಭಾಶಯಗಳು.
ಪೂಜ್ಯ ಶ್ರೀ ಡಾ. ಬಸವಲಿಂಗ ಪಟ್ಟದ್ದೇವರು ಬಸವಬಳ್ಳಿಯ ಚೇತನಕ್ಕೆ ಚೈತನ್ಯವಾಗಿ ಸರ್ವ ಕ್ಷೇತ್ರಗಳಲ್ಲೂ ಆಶಾದಾಯಕ ಧನಾತ್ಮಕ ಬೆಳವಣಿಗೆಯನ್ನು ಪೂಜ್ಯರು ಕಂಡು ಕೊಂಡರು. ಬಡತನದ ಬೇಗೆಯಲ್ಲಿ ಬೆಂದರೂ ಬದುಕಿನ ಛಲ ಬಿಡದೆ ಜ್ಞಾನವನ್ನು ಪಡೆಯುವ ಹಾದಿಯಲ್ಲಿ ನಿಜವಾದ ಸುಜ್ಞಾನವನ್ನು ಪಡೆದರು. ಸಾಮಾನ್ಯ ವಿದ್ಯಾರ್ಥಿಯಾಗಿ ಮಠದೊಳಗೆ ಪ್ರವೇಶ ಪಡೆದು ಆ ಮಠದ ಪೀಠಾಧಿಪತಿಯಾದರು. ಸರಿಯಾದ ಮಾರ್ಗ ದರ್ಶನವಿಲ್ಲದೆ ಜಾತಿ, ಮತ,ಪಂಥ,ಸಂಪ್ರದಾಯ, ಹೋಮ, ಹವನ, ಯಜ್ಞಯಾಗ, ಅಭಿಷೇಕ ಎಂದು ಎಲ್ಲೆಲ್ಲೋ ಸುತ್ತುತ್ತಿರುವ ಜನರಿಗೆ ಶರಣರ ವಚನಗಳು ತಿಳಿಸಿ, ಸರಿಯಾದ ಮಾರ್ಗ ದರ್ಶನ ಮಾಡುತ್ತಾ , ಬಸವತತ್ವದ ನೆಲೆಯಲ್ಲಿ ಸತ್ಯ ಶುದ್ಧದಿಂದ ವೈಚಾರಿಕತೆಯ ನಡೆಯಿಂದ ಆದರ್ಶರಾಗಿದ್ದಾರೆ. ಪೂಜ್ಯ ಶ್ರೀಗಳು ಬರೀ ಮಠಾಧೀಶರಾಗಿ ಇರದೆ , ಚರಜಂಗಮರಾಗಿ ಶರಣರ ಮಾರ್ಗವನ್ನು ಹಿಡಿದು ಅನ್ನ ದಾಸೋಹ, ಜ್ಞಾನ ದಾಸೋಹಗಳನ್ನು ಮಠದ ಎರಡು ಕಣ್ಣುಗಳಾಗಿ ಮಾಡಿದ್ದಾರೆ. ಮಾನವ ಕುಲವೇ ತನ್ನ ಕುಟುಂಬ ಎಂದು ವಿಶ್ವ ಪ್ರಜ್ಞೆಯನ್ನು ಹೊಂದಿದ ಪೂಜ್ಯರು, ಜಾತಿ ರಹಿತ ಕಲ್ಯಾಣ ರಾಜ್ಯ ಕಟ್ಟಬೇಕೆಂಬುದು ಅವರ ಪ್ರಮುಖ ಉದ್ದೇಶವಾಗಿದೆ. ಪ್ರಜಾಪ್ರಭುತ್ವದ ವ್ಯವಸ್ಥೆಯನ್ನು ಹೊಂದಿರುವ ನಮ್ಮ ದೇಶ ಅನೇಕ ಜಟಿಲವಾದ ಸಮಸ್ಯೆಗಳನ್ನು ಎದುರಿಸುತ್ತಿದೆ. ಅದಕ್ಕಾಗಿ ಪೂಜ್ಯರು ಅಜ್ಞಾನ,ಮೌಢ್ಯತೆ, ಅಂಧಶ್ರದ್ಧೆ, ಭಯೋತ್ಪಾದನೆ, ಜಾತಿಯತೆ, ಬಡತನದಂಥ ಹತ್ತು ಹಲವಾರು ಸಮಸ್ಯೆಗಳಿಗೆ ಪೂಜ್ಯರು ಶ್ರೀಗಳು ಸ್ಪಂದಿಸುತ್ತಾರೆ.
ಬಸವ ಶಿಶುಗಳ ದಿನಾಚರಣೆ ಎಂದು ಪೂಜ್ಯ ಶ್ರೀ ಬಸವಲಿಂಗ ಪಟ್ಟದ್ದೇವರು ಪ್ರತಿ ವರ್ಷ ತಮ್ಮ ಹುಟ್ಟು ಹಬ್ಬ ಅಗಸ್ಟ್ 25 ಕ್ಕೆ ಸುದೈವಿ ಮಕ್ಕಳ (ಬಸವ ಶಿಶುಗಳ) ದಿನಾಚರಣೆಯಾಗಿ ಆಚರಿಸುತ್ತಾರೆ. ಒಬ್ಬ ಮಠಾಧೀಶರಾಗಿ ಪೂಜ್ಯರು ಅನಾಥ ಮಕ್ಕಳಿಗೆ ತಾಯಿಯಾಗಿ, ತನ್ನ ಮಮತೆಯ ಮಡಿಲಲ್ಲಿ ಪ್ರೀತಿ ವಾತ್ಸಲ್ಯಗಳಿಂದ ನೋಡಿಕೊಳ್ಳುತ್ತಾರೆ. ಅನಾಥ ಎಂದರೆ ಮಕ್ಕಳ ಮೃದು ಮನಸ್ಸಿನ ಮೇಲೆ ಪರಿಣಾಮ ಬೀರುತ್ತದೆ ಎಂಬ ಕಾಳಜಿಯಿಂದ ಬಸವ ಶಿಶುಗಳು ಎಂದು ಕರೆಯುತ್ತಾರೆ. ತಮ್ಮ ಜನ್ಮ ದಿನವನ್ನು ಸುದೈವಿ ಮಕ್ಕಳ ದಿನಾಚರಣೆಯಾಗಿ ಆಚರಿಸುತ್ತಿರುವ ಪೂಜ್ಯ ಶ್ರೀ ಬಸವಲಿಂಗ ಪಟ್ಟದ್ದೇವರ ಮಹತ್ವದ ಕಾರ್ಯಕ್ಕೆ ಹೃತ್ಪೂರ್ವಕ ಭಕ್ತಿಯ ಅಭಿನಂದನೆಗಳು.
–ಜಯಶ್ರೀ ಸುಕಾಲೆ ಬೀದರ್
