ಲಿಂಗಾಯತ ಕ್ರಾಂತಿ Just another WordPress site
Related Articles
ಬೆಳಗಾವಿ: ಹನ್ನೆರಡನೆಯ ಶತಮಾನದ ಬಸವಾದಿ ಶಿವಶರಣರು ಕೇವಲ ಆಧ್ಯಾತ್ಮಿಕ ಸಾಧನೆ ಮಾತ್ರವಲ್ಲದೆ ಸಾಮಾಜಿಕ ಸುಧಾರಣೆಗೂ ಕೂಡ ಶ್ರಮವಹಿಸಿ, ಕಾಯಕ ದಾಸೋಹ ಮೂಲಕ ತತ್ವಗಳ ತಮ್ಮ ಅನುಭಾವದ ವಚನಗಳನ್ನು ರಚಿಸಿ, ವಚನಗಳ ಆಶಯದಂತೆ ತಾವು ಬದುಕಿ ಮುಂದಿನ ಪೀಳಿಗೆ ಹೇಗೆ ಬದುಕಬೇಕೆಂಬ ಸಂದೇಶ ಸಾರಿ ಎಲ್ಲರ ಬದುಕಿಗೆ ಬೆಳಕಾದವರು ಎಂದು ಹಿರಿಯ ಸಾಹಿತಿ ಹಮೀದಾಬೇಗಂ ದೇಸಾಯಿ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.
ಬೆಳಗಾವಿಯ ಮಹಾಂತೇಶ ನಗರದ ಮಹಾಂತ ಭವನದಲ್ಲಿ, ಜಾಗತಿಕ ಲಿಂಗಾಯತ ಮಹಾಸಭೆ ಹಾಗೂ ರಾಷ್ಟ್ರೀಯ ಬಸವ ಸೇನೆ ಬೆಳಗಾವಿ ಜಿಲ್ಲಾ ಘಟಕಗಳ ಸಂಯುಕ್ತ ಆಶ್ರಯದಲ್ಲಿ ಮಾಸಿಕ ಅನುಭಾವ ಸತ್ಸಂಗ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಆರಂಭದಲ್ಲಿ ವಿಶ್ವಗುರು ಬಸವೇಶ್ವರ ಭಾವಚಿತ್ರಕ್ಕೆ ಗೌರವ ಸಮರ್ಪಿಸಿ, ಬಳಿಕ ಲಿಂಗಾಯತ ಧರ್ಮದ ಧ್ವಜಾರೋಹಣ ನೆರವೇರಿಸಲಾಯಿತು.
ಈ ವೇಳೆ ವಿಶೇಷ ಉಪನ್ಯಾಸಕರಾಗಿ ಆಗಮಿಸಿದ್ದ ಸಾಹಿತಿ ಹಮೀದಾಬೇಗಂ ದೇಸಾಯಿ ಅವರು ಮಾತನಾಡಿ ಮಾನವೀಯ ಮೌಲ್ಯಗಳನ್ನು ಜಗತ್ತಿಗೆ ನೀಡಿದ ಬಸವಣ್ಣನವರನ್ನು ವಿಶ್ವಗುರು ಎಂದು ಎಲ್ಲರೂ ಒಪ್ಪಬೇಕಾದರೆ ಅವರ ಸಾಧನೆಯ ಆಳ ನಮಗೆ ಅರ್ಥವಾಗುವದು. ಗುರು ಲಿಂಗ ಜಂಗಮ ಇವು ಮೂರೂ ಬೇರೆ ಬೇರೆ ಅಲ್ಲ. ಒಂದಕ್ಕೊಂದು ಪೂರಕವಾದುವು. ಗುರು ಒಬ್ಬ ವ್ಯಕ್ತಿ ಅಲ್ಲ.ತನ್ನರಿವೆ ತನಗೆ ಗುರು. ಅರಿವು ಗುರುವಾದಾಗ ಲಿಂಗ ಪ್ರಾಣವಾಗುವದು.ಗುರು, ಲಿಂಗದ ಲಿಂಗಾಂಗ ಸಾಮರಸ್ಯವೇ ಜಂಗಮ. ಚಲನಶೀಲ ಜಗತ್ತೇ ಜಂಗಮ. ಗುರು ಶಿಷ್ಯರ ಸಂಭಂದ ಅವಿನಾಭಾವ ಸಂಬಂಧ ಅದನ್ನು ಬೇರ್ಪಡಿಸಲು ಸಾಧ್ಯವಿಲ್ಲ. ಗುರು,ಲಿಂಗ,ಜಂಗಮ ಮತ್ತು ಪ್ರಸಾದ ಇವು ನಾಲ್ಕು ಬಸವ ತತ್ವದ ಆಶ್ರಮಗಳು. ಚಲನಶೀಲ ವಾದ ಜಗತ್ತೇ ಜಂಗಮ. ಜಂಗಮ ಜಾತಿಯಲ್ಲ.ಭಕ್ತನಾದಲ್ಲಿ ಶರಣನಾಗಬಹುದು ಎಂದು ಹೇಳಿದರು.
ನಂತರ ಕಾರ್ಯಕ್ರಮದಲ್ಲಿ ದಿವ್ಯ ಸಾನಿಧ್ಯ ವಹಿಸಿದ್ದ ನಾಗನೂರು ರುದ್ರಾಕ್ಷಿ ಮಠದ ಪರಮ ಪೂಜ್ಯ ಡಾ.ಅಲ್ಲಮಪ್ರಭು ಮಹಾಸ್ವಾಮಿಗಳು ಮಾತನಾಡಿ ಮುಂಬರುವ 2011ರ ಜನಗಣತಿಯಲ್ಲಿ ಧರ್ಮದ ಕಾಲಂನಲ್ಲಿ “ಲಿಂಗಾಯತ ಅಂತಾ ಬರೆಯಿಸಿರಿ ಅಂತಾ ಕರೆಕೊಟ್ಟರು. ಜಾಗತಿಕ ಲಿಂಗಾಯತ ಮಹಾಸಭೆಯ ಜಿಲ್ಲಾ ಸಮಾವೇಶವನ್ನು ಅಯೋಜಿಸುವ ಕುರಿತು ಪೂರ್ವಭಾವಿಯಾಗಿ ಸಭೆಯನ್ನು ಇದೇ ಫೆ.18ರಂದು 11 ಗಂಟೆಗೆ ಗುರುವಾರ ಎಸ್.ಜಿ. ಬಾಳೇಕುಂದ್ರಿ ತಾಂತ್ರಿಕ ಮಹಾವಿದ್ಯಾಲಯದ ಸಭಾಂಗಣದಲ್ಲಿ ಗದಗ-ಡಂಬಳ ತೋಂಟದಾರ್ಯ ಮಠದ ಡಾ.ತೋಂಟದ ಸಿದ್ಧರಾಮ ಶ್ರೀಗಳ ನೇತೃತ್ವದಲ್ಲಿ ಕರೆಯಲಾಗಿದ್ದು ಎಲ್ಲರೂ ಭಾಗವಹಿಸುವಂತೆ ಕರೆ ನೀಡಿದರು.
ಈ ವೇಳೆ ಲಿಂಗಾಯತ ಮುಖಂಡರಾದ ಅರವಿಂದ ಪರುಶೆಟ್ಟಿ, ಬಸವರಾಜ ರೊಟ್ಟಿ, ಶಂಕರ ಗುಡಸ, ಚಂದ್ರಪ್ಪ ಬೂದಿಹಾಳ, ಅಶೋಕ ಮಳಗಲಿ ಬಸವರಾಜ ಭಾಗೋಜಿ, ಅಡಿವೆಪ್ಪ ಬೆಂಡಿಗೇರಿ ಸೇರಿದಂತೆ ಇನ್ನಿತರರು ಉಪಸ್ಥಿತರಿದ್ದರು.
