Breaking News
Home / featured / ಕಾಯಕದಲ್ಲೇ ದೇವರ ಕಂಡ ಕೇತಲಾದೇವಿ

ಕಾಯಕದಲ್ಲೇ ದೇವರ ಕಂಡ ಕೇತಲಾದೇವಿ

 

ಹನ್ನೆರಡನೆಯ ಶತಮಾನದ ಬಸವಾದಿ ಶರಣರ ಸಮಕಾಲೀನ ಶಿವಶರಣೆ ಕೇತಲದೇವಿಯು ಶರಣ ಕುಂಬಾರ ಗುಂಡಯ್ಯನವರ ಧರ್ಮಪತ್ನಿ. ಕುಂಬಾರ ಗುಂಡಯ್ಯ ಮತ್ತು ಕೇತಲದೇವಿ ಶರಣಜೀವಿಗಳು ಮೂಲತಃ ಬೀದರ ಜಿಲ್ಲೆಯ ಭಾಲ್ಕಿ ಪಟ್ಟಣದವರು. ಬಸವಕಲ್ಯಾಣದಿಂದ ನಲವತ್ತು ಕಿ.ಮೀ. ದೂರದಲ್ಲಿರುವ ಭಾಲ್ಕಿಯು ತನ್ನದೇ ಆದ ಐತಿಹಾಸಿಕ ಪರಂಪರೆ ಹೊಂದಿರುವ ತಾಲೂಕು ಕೇಂದ್ರ ಕೂಡ ಹೌದು.

ಶರಣೆ ಕೇತಲಾದೇವಿಯ ಆರಾಧ್ಯ ದೈವ ‘ಕುಂಭೇಶ್ವರ’.
ಇಂದಿಗೂ ಭಾಲ್ಕಿಯ ಕುಂಬಾರಗಲ್ಲಿಯ ಕೋಟೆ ಒಳಗಡೆ ‘ಕುಂಭೇಶ್ವರ ದೇವಾಲಯ’ ಇದೆ‌.
ಕುಂಬಾರ ಗುಂಡಯ್ಯ ಮತ್ತು ಕೇತಲಾದೇವಿಯ ದಂಪತಿಯ ಸಮಾಧಿಗಳು ಭಾಲ್ಕಿಯ ಕುಂಭೇಶ್ವರ ದೇವಾಲಯದ ಆವರಣದಲ್ಲಿವೆ. ಅದನ್ನು ‘ಶರಣರ ಸ್ಮಾರಕ’ವಾಗಿ ರೂಪಿಸುವುದು ಸ್ಥಳೀಯರ ಬೇಡಿಕೆಯಿದೆ.

ಗುಂಡಯ್ಯನವರ ಕುಲ ಕಸುಬು ಮಡಿಕೆ, ಕುಡಿಕೆ, ಹಣತೆ, ಇತ್ಯಾದಿ ಮಣ್ಣಿನ ಕಲಾಕೃತಿಗಳನ್ನು ಸಿದ್ದಪಡಿಸುವುದು. ನಿಷ್ಠೆಯ ಕಾಯಕ ಮೂಲಕವೇ ಜೀವನ ನಡೆಸಿದ ದಂಪತಿಗಳು ದುಡಿಮೆಗೆ ಮೊದಲ ಆದ್ಯತೆ ನೀಡಿದರು. ಹೀಗಾಗಿ ಎಲ್ಲಾ ಶರಣರು ಗುಂಡಯ್ಯನವರಿಗೆ ‘ನಿಷ್ಠೆಯ ಕಾಯಕ ಶರಣ’ ‘ ಕಾಯಕ ಯೋಗಿ’ ಹೀಗೆ ಹಲವು ನಾಮಗಳಿಂದ ಕರೆಯುತ್ತಿದ್ದರು. ಸತ್ಯ ಶುದ್ಧ ಕಾಯಕ, ದಾಸೋಹ ಮನೋಭಾವ ಹೊಂದಿರುವ ಅವರು ನಡೆ ನುಡಿ ಸಿದ್ದಾಂತದಲ್ಲಿ ಪರಿಶುದ್ಧರಾಗಿ ಭಕ್ತಿಯಲ್ಲಿಯೇ ದೇವರನ್ನು ಕಂಡುಕೊಳ್ಳಲು ಪ್ರಯತ್ನಿಸಿದರು.

ಸಮಾನತೆ ಸಂಕೇತಿಸುವ ಅನುಭವ ಮಂಟಪದಲ್ಲಿ ಭಾಗವಹಿಸಲು ಎಲ್ಲಾ ಶರಣರಿಗೆ ಮುಕ್ತ ಅವಕಾಶವಿತ್ತು. ಜಾತಿ, ಮತ, ಪಂಥ,ಲಿಂಗ ತಾರತಮ್ಯ ಎನ್ನದೇ ಎಲ್ಲಾ ವಚನಕಾರರು ತಮ್ಮ ತಮ್ಮ ಚಿಂತನೆಗಳನ್ನು ಅಭಿವ್ಯಕ್ತಿಗೊಳಿಸುವ ವ್ಯಕ್ತಿ ಸ್ವಾತಂತ್ರ್ಯ ಅಂದೇ ಪಡೆದುಕೊಂಡಿದ್ದರು. ಈ ಸಾಮಾಜಿಕ ಸುಧಾರಣೆಯ ಚಳುವಳಿಯಲ್ಲಿ ಕೇತಲಾದೇವಿ ಹಾಗೂ ಕೇತಲಾದೇವಿ ದಂಪತಿಗಳು ಭಾಗಿಯಾಗಿದ್ದರು. ಸತ್ಯ ಶುದ್ಧ ಕಾಯಕ ಬದುಕು ಗುಂಡಯ್ಯನವರ ಚೈತನ್ಯ ವೃದ್ಧಿಗೆ ಕಾರಣವಾಯಿತು. ತನ್ನ ವೃತ್ತಿಯನ್ನೇ ನಂಬಿ ಬದುಕಿದ ಗುಂಡಯ್ಯನವರಿಗೆ ಕಾಯಕ ತತ್ವಕ್ಕೆ ಹೆಚ್ಚು ಮಹತ್ವ ನೀಡುತ್ತಿದ್ದರು. ಗುಂಡಯ್ಯನವರು ಕೂಡ ವಚನಗಳು ರಚಿಸಿರಬಹುದು, ಆದರೆ ಅವರ ಯಾವುದೇ ವಚನಗಳು ಇಂದು ಲಭ್ಯವಿಲ್ಲ. ಆದರೂ ಅವರ ಸತ್ಯ ಶುದ್ಧವಾದ ಕಾಯಕ, ನಿಷ್ಠೆಯ ಭಕ್ತಿ ಪ್ರಸ್ತುತ ಸಮಾಜಕ್ಕೆ ದಾರಿದೀಪವಾಗಿದೆ.

ಗುಂಡಯ್ಯನವರ ಪುಣ್ಯಸ್ತ್ರೀ ಕೇತಲದೇವಿ ಗಂಡನ ನಿಷ್ಠೆಯ ಕಾಯಕ, ಭಕ್ತಿ ಭಾವವನ್ನು ಮೆಚ್ಚಿ ಬದುಕಿದರು. ಕಾಯಕದಲ್ಲಿಯೇ ದೇವರನ್ನು ಕಂಡುಕೊಳ್ಳಲು ‘ಸಮರಸ ಜೀವನ’ ನಡೆಸಿದ ಶರಣ ದಂಪತಿಗಳು ಪ್ರಸ್ತುತ ಸಮಾಜಕ್ಕೆ ಆದರ್ಶವಾಗಿದ್ದಾರೆ. ಕೇತಲಾದೇವಿಯವರು ‘ಕುಂಭೇಶ್ವರ ‘ ಅಥವಾ ‘ಕುಂಭೇಶ್ವರ ಲಿಂಗ’ ಎನ್ನುವ ವಚನಾಂಕಿತದಲ್ಲಿ ರಚಿಸಿರುವ ಎರಡು ವಚನಗಳು ಮಾತ್ರ ನಮಗೆ ಉಪಲಬ್ಧವಾಗಿವೆ.

ಕೇತಲದೇವಿಯವರು ಒಂದು ವಚನದಲ್ಲಿ ತಮ್ಮ ವೃತ್ತಿಯನ್ನು ಪರಿಭಾಷೆಯಾಗಿ ಬಳಸಿ ಚಿಂತನೆಯನ್ನು ಅಭಿವ್ಯಕ್ತಿಗೊಳಿಸಿದ್ದಾರೆ, ಮತ್ತೊಂದು ವಚನದಲ್ಲಿ ಲಿಂಗವಂತರ ನಡೆ – ನುಡಿ, ಆಚರಣೆ ತತ್ವದ ಬಗ್ಗೆ ತುಂಬಾ ಮಾರ್ಮಿಕವಾಗಿ ವಿಶ್ಲೇಷಿಸಿದ್ದಾರೆ.
ಕಾಯಕ ಮಹತ್ವ, ಜೀವಾನುಭವ ಒಳಗೊಂಡಿರುವ ಕೇತಲಾದೇವಿಯವರ ಎರಡು ವಚನಗಳು ಪ್ರಸ್ತುತ ಸಮಾಜಕ್ಕೆ ಅನನ್ಯ ಸಂದೇಶ ನೀಡುವ ಮಹತ್ವದ ವಚನಗಳು. ‘ಸತಿಪತಿಗಳೊಂದಾದ ಭಕ್ತಿ ಹಿತವಾಗಿಪ್ಪುದು ಶಿವಂಗೆ’ ಎನ್ನುವ ತತ್ವವನ್ನು ಕೇತಲದೇವಿಯವರು ಬದುಕಿನುದ್ದಕ್ಕೂ ಅಳವಡಿಸಿಕೊಂಡಿದ್ದರು‌. ಹೀಗಾಗಿಯೇ ಅವರ ಬದುಕು – ಕಾಯಕ – ತತ್ವ ಮಹೋನ್ನತವಾದದ್ದು.

ಕೇತಲಾದೇವಿಯವರ ಎರಡು ವಚನಗಳು ಹೀಗಿವೆ;

“ಹದ ಮಣ್ಣಲ್ಲದೆ ಮಡಕೆಯಾಗಲಾರದು.
ವ್ರತಹೀನನ ಬೆರೆಯಲಾಗದು.
ಬೆರೆದಡೆ ನರಕ ತಪ್ಪದು
ನಾನೊಲ್ಲೆ ಬಲ್ಲೆನಾಗಿ, ಕುಂಭೇಶ್ವರಾ”

ಈ ಮೇಲಿನ ವಚನದಲ್ಲಿ ‘ಹದ ಮಣ್ಣಲ್ಲದೆ ಮಡಕೆಯಾಗಲಾರದು’ ಎನ್ನುವ ಕೇತಲಾದೇವಿಯವರು ವೃತ್ತಿ ಬದುಕಿನ ಕುರಿತಾದ ಅನುಭವ ಕುರಿತು ಉಲ್ಲೇಖಿಸುತ್ತಾರೆ. ಮಣ್ಣಿನ ಮಡಿಕೆಗಳನ್ನು ಸಿದ್ದಪಡಿಸುವುದು ಅಷ್ಟು ಸುಲಭದ ಕೆಲಸವಲ್ಲ. ಜಿಗುಟಾದ ಹದ ಮಣ್ಣು ತಂದು ಸೋಸಿ ಮಣ್ಣಿನಲ್ಲಿರುವ ಕಸ, ಕಡ್ಡಿ, ಸಣ್ಣಕಲ್ಲುಗಳನ್ನು ಬೇರ್ಪಡಿಸಬೇಕಾಗುತ್ತದೆ. ಹದ ಮಾಡಿರುವ ಮಣ್ಣಿನಲ್ಲಿ ಸಾಸಿವೆಯಷ್ಟು ಸಣ್ಣ ಕಲ್ಲಿನ ಚೂರುಗಳಿದ್ದರೂ ಸಾಕು, ಅದು ಮಡಿಕೆ ತಯಾರಿಕೆಗೆ ಯೋಗ್ಯವಲ್ಲ. ಕಲ್ಲಿನ ಚೂರುಗಳಿರುವ ಮಡಕೆಗಳು ಬಿರುಕು ಬಿಡುತ್ತವೆ, ಅಂತಹ ಮಡಿಕೆಗಳು ಬೆಂಕಿಯಲ್ಲಿಟ್ಟು ಸುಡುವಾಗ ಸಿಡಿದು ಪೂರ್ತಿಯಾಗಿ ಒಡೆದು ಹಾಳಾಗುತ್ತವೆ ಎನ್ನುವ ಭಾವ ಈ ವಚನದಲ್ಲಿ ಕಾಣುತ್ತೇವೆ.

ಇಲ್ಲಿ ಮಣ್ಣು ರೂಪಕವಾಗಿ ಬಳಸಿರುವ ಶರಣೆ ಕೇತಲಾದೇವಿಯವರು ಮಾನವನ ದೇಹದ ಜೊತೆಗೆ ಹೋಲಿಸಿರುವುದು ಕಾಣುತ್ತೇವೆ. ಮಡಿಕೆವೆಂಬ ದೇಹವನ್ನು ಪರಿಶುದ್ಧವಾಗಿ ಹದ ಮಾಡಿಕೊಳ್ಳಬೇಕು, ಯೋಗ್ಯವಾದ ಆಹಾರ, ನೀರು ಸೇವನೆ ಜೊತೆಗೆ ಬದುಕಿನಲ್ಲಿ ಮಾನವೀಯ ಮೌಲ್ಯಗಳನ್ನು ಬೆಳೆಸಿಕೊಳ್ಳುವುದು ಅಷ್ಟೇ ಮುಖ್ಯವಾಗಿದೆ. ಇದನ್ನು ಅನುಷ್ಠಾನವಾದರೆ ಮಾನವನ ದೇಹ ಕೂಡ ಮಡಿಕೆಯ ಹಾಗೇ ಪರಿಶುದ್ಧ, ಪಕ್ವವಾಗುತ್ತದೆ, ಯೋಗ್ಯತೆಯ ಬದುಕು ನಮ್ಮದಾಗುತ್ತದೆ ಎನ್ನುವ ಸಾರ್ಥಕ ಜೀವನಕ್ಕೆ ಅಗತ್ಯ ಸಲಹೆಗಳು ಪ್ರತಿಪಾದಿಸಿದ್ದಾರೆ.

‘ಮಡಿಕೆಯ ಮಾಡುವಡೆ ಮಣ್ಣೆ ಮೊದಲು’ ಎನ್ನುವ ಬಸವಣ್ಣನವರ ವಚನ ಬದುಕಿನ ಪಾಠ ಕಲಿಸುತ್ತದೆ.
ಕುಂಬಾರಿಕೆ ವೃತ್ತಿ ತುಂಬಾ ಕಲಾತ್ಮಕವಾಗಿದೆ. ಹಾಗೇ ಗುಂಡಯ್ಯನವರಿಗೂ ಕುಂಬಾರಿಕೆ ಕಲೆ ಕರಗತವಾಗಿತ್ತು. ಜೊತೆಗೆ ವಾಸ್ತವ ಜಗತ್ತಿನ ಬಗ್ಗೆ ಯೋಚಿಸುತ್ತಾ ಸದಾ ಸಮ – ಸಮಾಜಕ್ಕಾಗಿ ಅವರು ಮಿಡಿಯುತ್ತಿದ್ದರು. ಮಡಿಕೆ ತಯಾರಿಸಬೇಕಾದರೆ ಮಣ್ಣು ಹದಮಾಡಬೇಕು. ಗಡಿಗೆಗಳಿಗೆ ಹದ ಮಣ್ಣಿನ ಅವಶ್ಯವಿದೆಯೋ ಹಾಗೇ ದುರ್ಬುದ್ಧಿ, ದುರ್ಗುಣ, ದುಶ್ಚಟಗಳಿಂದ ಬಿಡುಗಡೆಯಾಗಬೇಕಾದರೆ ಪರಿಶುದ್ಧ, ಸಮಚಿತ್ತ, ಸದ್ವಿಚಾರ ಹೊಂದಿದವರ ಸಂಗ ತೀರಾ ಅಗತ್ಯ. ಉತ್ತಮ ಬದುಕು ರೂಪಿಸಿಕೊಳ್ಳಬೇಕಾದರೆ ದೂರದೃಷ್ಟಿ, ಅರಿವಿನ ಪ್ರಜ್ಞೆ ತುಂಬಾ ಅವಶ್ಯವಾಗಿದೆ ಎಂದು ಶರಣರು ತಿಳಿಸುತ್ತಾರೆ.

‘ವೃತ್ತ ಹೀನನ ಬೆರೆಯಲಾಗದು. ಬೆರೆದಡೆ ನರಕ ತಪ್ಪದು ನಾನೊಲ್ಲೆ ಬಲ್ಲೆನಾಗಿ ಕುಂಭೇಶ್ವರಾ’ ಎಂದು ಸೂಚಿಸುತ್ತಾರೆ. ಮಣ್ಣು ಮಾಡುವುದು ಕೂಡ ವೃತ್ತಾಚರಣೆಗೆ ಸಮವಾಗಿದೆ. ಹಾಗೇ ಪ್ರತಿಯೊಬ್ಬರು ವೃತ್ತಾಚರಣೆಯ ಮೂಲಕ ತನ್ನಲ್ಲಿರುವ ಅಶಕ್ತ, ದೌರ್ಬಲ್ಯಗಳಿಂದ ಮುಕ್ತಿ ಹೊಂದಬೇಕು, ಉತ್ತಮ ಸಂಸ್ಕಾರ ಪಡೆದ ಮಣ್ಣು ಯೋಗ್ಯ ಗಡಿಗೆಯಾಗಿ ರೂಪಗೊಂಡಿರುತ್ತದೆ. ಹಾಗೇ ಮಾನವನ ದೇಹವೂ ಉತ್ತಮ ಸಂಸ್ಕಾರ ಹೊಂದಿದರೆ ಮಾತ್ರ ಪರಿವರ್ತನೆಯಾಗಲು ಸಾಧ್ಯ. ಅದು ಮಾನವನನ್ನು ವಿಶ್ವಮಾನವನಾಗಿ ಬದಲಿಸುವ ಸತ್ಪಥ ಎಂದು ವಚನಕಾರ್ತಿ ಕೇತಲಾದೇವಿಯವರು ಮನಮುಟ್ಟುವಂತೆ ಬೋಧಿಸುತ್ತಾರೆ.

ಮನಸ್ಸು ಪರಿಶುದ್ಧಗೊಳಿಸುವುದು ಸುಲಭದ ಕೆಲಸವಲ್ಲ. ಮೊದಲು ಅಂತರಂಗ ಶುದ್ಧೀಕರಣಗೊಳ್ಳಬೇಕು, ಸಪ್ತ ವ್ಯಸನಗಳಿಂದ ಮುಕ್ತಿ ಆಗಬೇಕು, ಅನುಭಾವಿ ಶರಣರ ಸಂಗ ಲೇಸೆಂದು ಬಯಸಬೇಕು. ಮಹಾತ್ಮ , ದಾರ್ಶನಿಕರ ಚಿಂತನಾರ್ಹ ಸಾಹಿತ್ಯವನ್ನು ಆಳವಾಗಿ ಅಧ್ಯಯನ ಮಾಡಬೇಕು… ಹೀಗೆ ‘ಸಾರ್ಥಕ ಬದುಕಿನ ಸಂಸ್ಕಾರ ನೀತಿಗಳ’ ಕುರಿತು ಅದ್ಭುತವಾದ ಮಾರ್ಗದರ್ಶನ ನೀಡುತ್ತಾರೆ. ಮಡಿಕೆ ಯಾವುದೇ ಆಗಲಿ ಸ್ವಾದ ಸಾಕಾರದಲ್ಲಿ ಭೇದವಿಲ್ಲ ಎನ್ನುವುದು ಶರಣರ ನಿಲುವು, ಹಸಿ ಮಣ್ಣಿನಿಂದ ಸಿದ್ದಪಡಿಸಿದ ಮಡಿಕೆ ಗಟ್ಟಿಯಾಗಿರುವುದಿಲ್ಲ, ಅದು ಬಳಕೆಗೂ ಯೋಗ್ಯವಾಗಿರುವುದಿಲ್ಲ. ಸಿದ್ಧ ಮಾಡಿರುವ ಗಡಿಗೆಗಳನ್ನು ತಟ್ಟುತ್ತಾ ರೂಪ ನೀಡಬೇಕಾಗುತ್ತದೆ, ಆವಗಿಯಲ್ಲಿಟ್ಟು ಚನ್ನಾಗಿ ಸುಡಬೇಕಾಗುತ್ತದೆ.
ಸುಟ್ಟ ಮಡಿಕೆ ಗಟ್ಟಿಗೊಳ್ಳುತ್ತದೆ, ಸ್ವಾದ ರೂಪ ಹೊಂದಿರುವ ಮಡಿಕೆ ಪೂರ್ತಿ ಗಟ್ಟಿತನ ಪಡೆದುಕೊಳ್ಳುತ್ತದೆ.

ಕುಂಬಾರಿಕೆ ಕಾಯಕದಿಂದ ಹಣ ಸಂಪಾದನೆ ಮಾಡುವುದು ಗುಂಡಯ್ಯ ಕೇತಲದೇವಿ ದಂಪತಿಗಳ ಉದ್ದೇಶ ಆಗಿರಲಿಲ್ಲ. ಸಮಾಜದ ಹಿತವನ್ನು ಕಾಪಾಡುವುದು, ಮಾನವೀಯ ಮೌಲ್ಯಗಳ ಮೂಲಕ ಸಮಾನತೆ ಸಮಾಜ ಕಟ್ಟುವುದು ಅವರ ಪ್ರಮುಖವಾಗಿತ್ತು. ಹೀಗಾಗಿ ಅವರು ತಮ್ಮ ಕಾಯಕ ಸಿದ್ದಾಂತವನ್ನು ಶ್ರದ್ಧೆ ಭಕ್ತಿಯಿಂದ ನೆರೆವೇರಿಸಿದರು, ದಾಸೋಹ ಮನೋಭಾವವನ್ನು ಬೆಳೆಸಿಕೊಂಡು ಬದುಕಿದರು.

ಶರಣರ ಚಿಂತನೆಗಳು ಓದುತ್ತಾ ಹೋದಂತೆ ‘ಸಾಸಿವೆ ಮೇಲೆ ಸಾಗರ ಹರಿದಷ್ಟು’ ಖುಷಿಯಾಗುತ್ತದೆ, ಜೊತೆಗೆ ಆತ್ಮಜ್ಞಾನ ಕೂಡ ಹೆಚ್ಚಾಗುತ್ತದೆ. ಅಜ್ಞಾನದ ಕೂಪದಲ್ಲಿ ಬದುಕುತ್ತಿರುವ ಅಸಂಖ್ಯಾತ ಮನಸ್ಸುಗಳನ್ನು ಹದಮಾಡಿಕೊಳ್ಳಲು ಶರಣ ಮಾರ್ಗ ದಾರಿದೀಪವಾಗಿದೆ.‌ ಆದರೆ ವ್ರತ(ಸತ್ಯ ಶುದ್ಧ)ವನ್ನು ಅರಿಯದವರ ಜೊತೆಗೆ ಬೆರೆತುಕೊಳ್ಳಲು ‘ನಾನು ಒಲ್ಲೆ‌’ ಎಂದು ಕೇತಲಾದೇವಿ ಸಮಾಜದ ಅಸಮಾನತೆ, ಅಜ್ಞಾನದ ಕುರಿತು ಅಸಮಾಧಾನ ವ್ಯಕ್ತಪಡಿಸುತ್ತಾರೆ.

ಲಿಂಗಾಯತರು ಯಾರು? ಎನ್ನುವ ಪ್ರಶ್ನೆಗೆ ಕೇತಲಾದೇವಿಯವರ ಈ ವಚನದಲ್ಲಿ ಸ್ಪಷ್ಟತೆ ನೀಡುತ್ತದೆ.

“ಲಿಂಗವಂತರ ಲಿಂಗಾಚಾರಿಗಳ ಅಂಗಳಕ್ಕೆ ಹೋಗಿ
ಲಿಂಗಾರ್ಪಿತವ ಮಾಡುವಲ್ಲಿ ಸಂದೇಹವಿಲ್ಲದಿರಬೇಕು.
ಕಾಣುದುದನೆ ಚರಿಸದೆ, ಕಂಡುದನು ನುಡಿಯದೆ,
ಕಾಣುದುದನು ಕಂಡುದನು ಒಂದೇ ಸಮವೆಂದು ಅರಿಯಬಲ್ಲರೆ ಕುಂಭೇಶ್ವರ ಲಿಂಗವೆಂಬೆನು.”

ಲಿಂಗ,ವಿಭೂತಿ, ರುದ್ರಾಕ್ಷಿ ಮಾಲೆ ಧರಿಸಿಕೊಂಡ ಲಿಂಗವಂತರ ಬಾಹ್ಯ ಲಕ್ಷಣಗಳನ್ನು ನೋಡಿ ಒಬ್ಬರನ್ನು ‘ಲಿಂಗಾಯತರು’ ಎಂದು ಗುರುತಿಸಲು ಸಾಧ್ಯವಿಲ್ಲ.
ಅವು ಬರೀ ಲಾಂಛನಗಳಷ್ಟೇ, ಅವರನ್ನು ಲಿಂಗಾಯತರು ಎಂದು ಕರೆಯವುದು ಸಮಂಜಸವಲ್ಲ. ಬಾಹ್ಯ ಲಾಂಛನಗಳ ಧಾರಣೆಯ ಜೊತೆಗೆ ಅಂತರಂಗ ಕೂಡ ಪರಿಶುದ್ಧಗೊಳ್ಳಬೇಕು, ಧರ್ಮದ ತತ್ವ, ಸಿದ್ಧಾಂತಗಳಿಗೆ ಒಳಗೊಂಡಾಗ ಮಾತ್ರ ಅವರು ನಿಜವಾದ ಲಿಂಗಾಯತರು ಎನಿಸಿಕೊಳ್ಳಲು ಸಾಧ್ಯ ಎನ್ನುವ ‘ಲಿಂಗಾಚಾರ ಚಿಂತನೆ’ ಧರ್ಮ ಸಿದ್ಧಾಂತವನ್ನು ಶರಣೆ ಕೇತಲಾದೇವಿ ಪ್ರತಿಪಾದಿಸುತ್ತಾರೆ.

ಪ್ರಸ್ತುತ ಸಮಾಜದಲ್ಲಿ ಮಾನವೀಯ ಮೌಲ್ಯಗಳ ಬೆಳವಣಿಗೆ ತೀರಾ ಅಪರೂಪವಾಗಿದೆ. ಜಾತಿ ಮತ ಪಂಥ ಲಿಂಗ ತಾರತಮ್ಯ, ಅಸಮಾನತೆ, ಶೋಷಣೆ ತಾಂಡವವಾಡುತ್ತಿವೆ. ಎಲ್ಲಡೆ ಅರ್ಥಹೀನ ಆಚರಣೆಗಳ ವೈಭವೀಕರಣ ಮಿತಿಮೀರಿದೆ. ಇಂತಹ ಅವೈಜ್ಞಾನಿಕ, ಅವೈಚಾರಿಕ ಪದ್ಧತಿ ನಿರ್ನಾಮಕ್ಕೆ ಶರಣರ ವಚನಗಳು ಮಾರ್ಗದರ್ಶನವಾಗಿವೆ.

ಸಮಾನತೆ ಸಮಾಜ ಕಟ್ಟುವ ಮನೋಭಾವ ಹೊಂದಿರುವ ಮನಸ್ಸುಗಳ ಸಂಖ್ಯೆ ಇಂದು ಹೆಚ್ಚಾಗಬೇಕಾಗಿದೆ. ಮನುಷ್ಯತ್ವವನ್ನು ಎತ್ತಿ ಹಿಡಿದ ಬಸವಾದಿ ಶರಣರ ಚಿಂತನೆಗಳನ್ನು ಇಂದಿನ ಸಮಾಜ ಮರೆತಂತೆ ಕಾಣುತ್ತಿದೆ. ಶರಣರ ಚಿಂತನೆಗಳನ್ನು ಮುನ್ನೆಲೆಗೆ ಬರಬೇಕಾದರೆ ವಚನಗಳು ಹೃದಯದೊಳಗೆ ಇಳಿಸಿಕೊಳ್ಳಬೇಕಾಗಿದೆ.

– ಬಾಲಾಜಿ ಕುಂಬಾರ, ಚಟ್ನಾಳ
ಯುವ ಬರಹಗಾರ, ಬೀದರ್
Cell: 9739756216

About Shivanand

Admin : Lingayat Kranti Monthly news paper 8884000008 lingayatkranti@gmail.com

Check Also

ಶರಣರ ಚಿಂತನೆಗಳ ಅನುಭವ ಮಂಟಪ ನಿರ್ಮಿಸಿ: ಬಸವರಾಜ ಧನ್ನೂರ

  ‘ಸನಾತನ ಚಿಂತನೆಗಳ ಮರು ಸೃಷ್ಟಿ’ ಶೀರ್ಷಿಕೆಗೆ ಆಕ್ಷೇಪ ಬೀದರ್: ನೂತನ ಅನುಭವ ಮಂಟಪ ಭೂಮಿ ಪೂಜೆ ಕಾರ್ಯಕ್ರಮ ಕುರಿತು …

ಶರಣರ ಪ್ರಗತಿಪರ ಚಿಂತನೆಗೆ ಧಕ್ಕೆ ಮಾಡದಿರಿ: ಬಸವರಾಜ ಹೊರಟ್ಟಿ

  ಹುಬ್ಬಳ್ಳಿ: ಬಸವಕಲ್ಯಾಣದಲ್ಲಿ ನಿರ್ಮಿಸುತ್ತಿರುವ ಅನುಭವ ಮಂಟಪದ ಭೂಮಿಪೂಜೆ ಕಾರ್ಯಕ್ರಮದ ಕುರಿತು ಜ .6 ರಂದು ನೀಡಿದ ಜಾಹೀರಾತಿನಲ್ಲಿ ‘ಸನಾತನ …

ಸರಕಾರದ ವಿರುದ್ಧ ತೋಂಟದ ಸಿದ್ಧರಾಮ ಶ್ರೀಗಳ ಅಸಮಾಧಾನ

  ಲಿಂಗಾಯತ ಪ್ರಗತಿಪರ ಚಿಂತನೆಯ ಧರ್ಮವಾಗಿದೆ ಗದಗ : ಮಹಾಮಾನವತಾವಾದಿ ಪ್ರಗತಿಪರ ಚಿಂತಕ, ವಿಶ್ವಗುರು ಬಸವಣ್ಣನವರ ಕಾರ್ಯಕ್ಷೇತ್ರವಾಗಿದ್ದ ಬಸವಕಲ್ಯಾಣದಲ್ಲಿ ನೂತನ …

ವೇದಕ್ಕೆ ಒರೆಯ ಕಟ್ಟುವೆ

ಭಾರತದ ಚರಿತ್ರೆಯಲ್ಲಿ ಶರಣ ಚಳುವಳಿಗೆ ಒಂದು ವಿಶಿಷ್ಟವಾದ ಸ್ಥಾನ ಸಿಗುತ್ತದೆ. ಬೌದ್ಧ ಧರ್ಮದ ನಂತರ ಭಾರತದಲ್ಲಿ ಮತ್ತೊಮ್ಮೆ ಸಮಾಜೋಧಾರ್ಮಿಕ ಕ್ರಾಂತಿ …

ಸಮಾಜಕ್ಕಾಗಿ ಸರ್ವಸ್ವವನ್ನು ತ್ಯಾಗಮಾಡಿದ ತ್ಯಾಗವೀರ ಶಿರಸಂಗಿ ಲಿಂಗರಾಜರು

  ಲೇಖನ: ಡಾ. ತೋಂಟದ ಸಿದ್ಧರಾಮ ಮಹಾಸ್ವಾಮಿಗಳು ತೋಂಟದಾರ್ಯ ಸಂಸ್ಥಾನ ಮಠ ಗದಗ ಬೆಳಗಾವಿ: ಕರ್ನಾಟಕವನ್ನು ಶೈಕ್ಷಣಿಕವಾಗಿ ಹಾಗು ಸಾಂಸ್ಕೃತಿಕವಾಗಿ …

ಸನಾತನ ಶಬ್ದಕ್ಕೆ ಗೊ.ರು.ಚನ್ನಬಸಪ್ಪ ವಿರೋಧ

  ಬಸವಕಲ್ಯಾಣ: ರಾಜ್ಯ ಸರ್ಕಾರ ಪತ್ರಿಕೆಗಳಿಗೆ ನೀಡಿರುವ ಜಾಹೀರಾತಿನಲ್ಲಿ ಸನಾತನ ಪ್ರಗತಿಪರ ಚಿಂತನೆಯ ಮರುಸೃಷ್ಟಿ ನೂತನ ಅನುಭವ ಮಂಟಪ ನಿರ್ಮಾಣ’ …

ಸಮಗ್ರ ಚಿಂತನೆಯ ವಿಚಾರವಾದ ಮತ್ತು ಮುಲಾಜಿಗೆ ಬಸಿರಾಗುವ ಅರೆಬೆಂದ ವಿಚಾರವಾದ

ಕೆಲವು ಅಥವಾ ಹಲವು ಅರೆಬೆಂದ ವಿಚಾರವಾದಿಗಳು ಅನುಭವ ಮಂಟಪದ ನಿರ್ಮಾಣದ ಕುರಿತಾಗಿ ಆರ್ಥಿಕ ಸ್ಥಿತಿ ಮತ್ತು ಇತರೆ ಕಾರಣಗಳಿಂದ ೫೦೦ …

ಅನುಭವಮಂಟಪ ನಡೆದು ಬಂದ ದಾರಿ

ಬೀದರ್: ವಿಶ್ವರು ಬಸವಣ್ಣನವರು 12ನೇ ಶತಮಾನದಲ್ಲಿ ಜಗತ್ತಿನ ಮುಟ್ಟು ಮೊದಲು ಪ್ರಜಾಪ್ರಭುತ್ವದ ಮಾದರಿಯ ಅನುಭವ ಮಂಟಪವನ್ನು ಸ್ಥಾಪಿಸಿದರು. ಅನುಭವ ಮಂಟಪದಲ್ಲಿ …

ಲಿಬಿಜೆಪಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ರಾಜು ಚಿಕ್ಕನಗೌಡರ್ ನಿಧನ

  ಬೆಳಗಾವಿ: ಬೆಳಗಾವಿ ಲಿಂಗಾಯತ ಸಂಘಟನೆಯ ಸಕ್ರಿಯ ಕಾರ್ಯಕರ್ತ, ಭಾರತೀಯ ಜನತಾ ಪಾರ್ಟಿಯ ಜಿಲ್ಲಾ ಗ್ರಾಮೀಣ ಪ್ರಧಾನ ಕಾರ್ಯದರ್ಶಿ ರಾಜು …

2021ರ ಲಿಂಗಾಯತ ದಿನದರ್ಶಿಕೆ ಬಿಡುಗಡೆ ಹಾಗೂ ಶರಣ ಮೇಳದಲ್ಲಿ ಪಾಲ್ಗೊಳ್ಳಲು ಮನವಿ

ಗಜೇಂದ್ರಗಡ: ನಂಬಿಕೆಗೆ ಅರ್ಹವಲ್ಲದ ಪಂಚಾಂಗ, ಜ್ಯೋತಿಷ್ಯಕ್ಕೆ ಜೋತುಬಿದ್ದು, ಮೌಢ್ಯತೆಗೆ ಒಳಗಾಗಿ ನಮ್ಮ ಬದುಕನ್ನು ಕೆಡಿಸಿಕೊಳ್ಳುವುದರ ಬದಲಾಗಿ ಧರ್ಮಗುರು ಬಸವಣ್ಣ ಹಾಗೂ …

ಲಿಂಗಾಯತ– ವೀರಶೈವರ ‘ಒಬಿಸಿ ಬೇಡಿಕೆ’ ಮತ್ತು ಒಗ್ಗಟ್ಟಿನ ಹೋರಾಟ… ಧರ್ಮ, ರಾಜಕಾರಣ, ಸಾಮಾಜಿಕ ನ್ಯಾಯ

  ಲೇಖನ: ಡಾ. ಶಿವಮೂರ್ತಿ ಮುರುಘಾ ಶರಣರು ಬಾಬಾಸಾಹೇಬ್‌ ಅಂಬೇಡ್ಕರ್‌ ಅವರು ರಚಿಸಿದ ಸಂವಿಧಾನದ ದಿನವನ್ನು ರಾಷ್ಟ್ರದಾದ್ಯಂತ ಕಳೆದ ತಿಂಗಳು …

ಪತ್ರಕರ್ತ ಶಿವರಂಜನ್ ಸತ್ಯಂಪೇಟೆಗೆ ಪಿಎಚ್.ಡಿ.ಪದವಿ

  ಕಲಬುರಗಿ : ಪತ್ರಕರ್ತ-ಲೇಖಕ ಶಿವರಂಜನ್ ಸತ್ಯಂಪೇಟೆ ಅವರಿಗೆ ಗುಲ್ಬರ್ಗ ವಿಶ್ವವಿದ್ಯಾಲಯ ಪಿಎಚ್.ಡಿ ಪದವಿ ಪ್ರಧಾನ ಮಾಡಿದೆ. ಗುಲ್ಬರ್ಗ ವಿವಿ …

“ನಿಜ ಹೇಳದಿದ್ದರೂ ಪರವಾಗಿಲ್ಲ ಸುಳ್ಳು ಹೇಳಬೇಡಿ”

  ೧) ಬಸವ ಪರಂಪರೆ, ಶರಣ ಪರಂಪರೆ, ಲಿಂಗಾಯತ ಧರ್ಮವು 12ನೇ ಶತಮಾನದಲ್ಲಿ ಅರಿವೇ ಗುರು, ಆಚಾರವೇ ಲಿಂಗ, ಅನುಭಾವವೇ …

ಇತಿಹಾಸ ತಿರುಚುವ ರಂಭಾಪುರಿ ಶ್ರೀಗಳ ಕೃತ್ಯ ಖಂಡನೀಯ

ರಾಮದುರ್ಗ: ಸುವರ್ಣ ಚಾನೆಲ್ ನವರು ಎಡೆಯೂರ ಸಿದ್ಧಲಿಂಗ ಶ್ರೀಗಳ ಬಗ್ಗೆ ಧಾರಾವಾಹಿಯನ್ನು ಪ್ರಸಾರ ಮಾಡುತ್ತಿರುವುದು ಹೆಮ್ಮೆಯ ವಿಷಯವಾಗಿದೆ. ಅಭಿನವ ಅಲ್ಲಮನೆಂದೇ …

ಇಳಕಲ್ ಗುರುಮಹಾಂತ ಶ್ರೀಗಳಿಗೆ ‘ಸಂಯಮ ಪ್ರಶಸ್ತಿ’ ಪ್ರದಾನ

  ಬಾಗಲಕೋಟೆ: ಇಳಕಲ್‌ನ ಚಿತ್ತರಗಿ ವಿಜಯ ಮಹಾಂತೇಶ ಸಂಸ್ಥಾನ ಮಠದ ಗುರುಮಹಾಂತ ಶ್ರೀಗಳಿಗೆ ಉಪಮುಖ್ಯ ಮಂತ್ರಿ ಗೋವಿಂದ ಕಾರಜೋಳ ಶನಿವಾರ …

Leave a Reply

Your email address will not be published. Required fields are marked *

error: Content is protected !!